Dövlət sifarişli yerlərə qəbul planı artıq məlumdur. Bu istiqamətdə Tələbə Qəbulu üzrə Dövlət Komissiyası (TQDK) tərəfindən müvafiq işlər görülür. SİA-nın xəbərinə görə, TQDK sədri Məleykə Abbaszadə qəbulda bəzi yeniliklərin olacağını deyib. Növbəti 3 il üçün dövlət sifarişli yerlərə qəbul planı artıq Nazirlər Kabineti tərəfindən Tələbə Qəbul üzrə Dövlət Komissiyasına təqdim olunduğunu deyən TQDK sədri Məleykə Abbaszadə bildirib ki, ali məktəblərə qəbul zamanı əsas müsabiqə yalnız dövlət sifarişli yerlərdə olacaq: "Yəqin ki, gələcəkdə də boş qalacaq. Kifayət qədər özəl ali məktəblər var ki, onlar öz tələbələrini tapmırlar və insanlar həmin ali məktəblərdə oxumaq istəmirlər. Onlar dövlət sifarişli yerlərə qəbul olunmayıbsa, özəl ali məktəbdə oxumaqdansa, orta ixtisas məktəblərini üstün tuturlar".
Komissiya sədri vurğulayıb ki, Nazirlər Kabineti tərəfindən növbəti 3 il üçün nəzərdə tutulan dövlət sifarişli ixtisasların siyahısında qabiliyyət tələb edən ixtisaslar üzrə magistraturaya yerlər yoxdur: "Magistratura yalnız elmi araşdırmalarla, gələcəkdə elmlərlə məşğul olmaq istəyən insanlar üçün nəzərdə tutulub. Bu Nazirlər Kabineti tərəfindən bizə verilən qərardır və bununla əlaqədar müvafiq işlər aparılır".
Komissiya sədri qeyd edib ki, 2014-cü ildən tələbə qəbulu yeni model əsasında keçiriləcək. Onun sözlərinə görə, bununla bağlı komissiya öz təkliflərini hazırlayır: "Hazırda təhsilin gələcək 10 ili üzrə Təhsil Strategiyası hazırlanır və hələ ki, müzakirə edilməyib. İstərdik ki, bu konsepsiya müzakirə edildikdən sonra qəbul olunsun. Çünki bizim yeni modelə keçməyimiz yeni konsepsiyada nəzərdə tuulan müəyyən işlərlə uzlaşmalıdır deyə, yeni model barədə heç nə deyə bilmərəm. Konsepsiya müzakirə olunanda biz bu model barədə məlumat verəcəyik və ümidvaram ki, qəbul olunacaq. Bundan sonra ictimaiyyətə ətraflı məlumat vermək olacaq".
USD
EUR
GBP
RUB