"İnflasiya iqtisadi inkişafla bağlı olan bir prosesdir. Azərbaycan dövlətinin apardığı siyasət ona yönəldilib ki, inflasiyanın həddən artıq artmasına imkan verilməsin". SİA-nın xəbərinə görə, bunu Milli Məclisin İqtisadi siyasət komitəsinin sədri Ziyad Səmədzadə deyib. O bildirib ki, dövriyyədə pul kütləsi artdıqca inflasiya imkanları genişlənir. Ancaq dövlətin nəzarət sisteminin olduğunu deyən Z.Səmədzadə vurğulayıb ki, əhalinin pul gəlirlərinin artması inflasiyanın artmasını 2 dəfədən çox ötüb.
"İnkişaf olan yerdə inflasiya var. Amma biz çalışmalıyıq ki, qiymətlərin suni şəkildə şişirdilməsinə yol verilməsin. Azərbaycan dövlətinin siyasəti ondan ibarətdir ki, ölkənin iqtisadiyyatına investisiya qoyulması, gəlir və xərclərin artması prosesi inflasiya göstəricisi ilə təhlil edilir və çalışılır ki, əhalinin pul gəlirləri istehlak dəyəri indeksindən yüksək olsun. Azərbaycan dövlətinin büdcəsi ölkənin milli maraqlarına yönəldilən maliyyə sənədidir. Dünyada baş verən maliyyə böhranı bir çox ölkələrdə fəsadlara gətirib çıxarıb. Amma Azərbaycan əvvəlki illərdə olduğu kimi gələn il də dövlət büdcəsi, gəlir və xərclərini artırıb", - deyə Z.Səmədzadə əlavə edib.
Könül Kamilqızı
USD
EUR
GBP
RUB