Hacıqabulda xeyli sayda sərnişinin xəsarət alması ilə nəticələnən ağır yol qəzası baş verib. Xəsarət alan Gürcüstan vətəndaşlarından 19 nəfəri Şirvan şəhər mərkəzi xəstəxanasına çatdırılıb.
Hadisə bu gün Bakı-Qazax magistral yolunun Hacıqabul rayonunun Atbulaq qəsəbəsi ərazisindən keçən hissəsində qeydə alınıb. Belə ki, Tbilisi-Bakı marşrutu ilə Bakı istiqamətində hərəkətdə olan sərnişin avtobusu “KamAZ” markalı yük maşını və “Mersedes” markalı avtomobillə toqquşub. Nəticədə sərnişin avtobusu yolun kənarındakı yaşıllığa girib. Hadisə nəticəsində xeyli sayda xəsarət alan olub. Qəza yerinə Şirvan şəhər, Hacıqabul rayon və Ələt qəsəbəsindən təcili yardım maşınları cəlb edilib. Xəsarət alanlardan 17 nəfəri Şirvan şəhər Mərkəzi xəstəxanasına, digərləri isə Ələt qəsəbəsindəki xəstəxanaya çatdırılıb. Xəstəxanaya çatdırılanların xəsarətləri yüngül olsa da 1 nəfəri vəziyyəti ağır olduğundan əməliyyat olunub. Verilən məlumata görə, sərnişin avtobusunda 54 nəfər olub. Gürcüstanın Qori şəhərindən olan orta məktəb şagirdləri və onların valideynləri Bakıya ekskursiyaya gedirlərmiş.
USD
EUR
GBP
RUB