Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Qloballaşma və Milli Həmrəylik" İctimai Birliyinin həyata keçirdiyi "Onlayn media resurslarında şəxsi həyat sirrinin qorunması mövzusunda tədbirlərin təşkili" layihəsinə yekun vurulub. Bununla bağlı keçirilən tədbirdə "Qloballaşma və Milli Həmrəylik" İctimai Birliyinin sədri Həsən Qarayev çıxış edərək bildirib ki, layihənin əsas məqsədi onlayn xəbər istehsalçılarında "şəxsi həyat sirrinin qorunması" prinsipləri barədə təsəvvür formalaşdırmaq, auditoriyada "şəxsi həyat sirri" prinsiplərinin qorunması vərdişləri yaratmaq, mövzu barədə beynəlxalq təcrübənin öyrənilib Azərbaycanda tətbiq edilməsinə yardım göstərməkdən ibarət olub. Diqqətə çatdırılıb ki, bu günə qədər layihə çərçivəsində paytaxt Bakı ilə yanaşı, Xaçmaz, Masallı və Mingəçevir rayonlarında tədbirlər təşkil edilib.
Layihə rəhbəri eyni zamanda vurğulayıb ki, tədbirə qatılan paytaxt və regionlarda yaşayıb fəaliyyət göstərən onlayn xəbər istehsalçıları, eləcə də aktiv sosial şəbəkə istifadəçiləri "Şəxsi həyat sirri" hüquqlarına dair bilgilər, jurnalistin peşə prinsipləri, etik qaydaları haqqında, KİV haqqında qanunlarla bağlı geniş məlumatlar əldə ediblər.
Həsən Qarayev onu da bildirib ki, layihə çərçivəsində verilişlər hazırlanaraq televiziyada yayımlanıb, eyni zamanda kitabça nəşr olunub.
Tədbirdə digər çıxış edənlər də layihənin əhəmiyyətindən və media nümayəndələrinə, həmçinin cəmiyyətə verdiyi töhfələrdən danışıblar.
Tədbirdə iştirakçıları maraqlandıran suallara da aydınlıq gətirilib.