Zahid Qaralov: “Heydər Əliyev YAP-ı yaratmaqla siyasi təfəkkürü dəyişdi və siyasi mədəniyyət gətirdi”

13 Dekabr 2011 14:10 (UTC+04:00)

Ulu öndər Heydər Əliyev dünya tarixinə qurucu yaradıcı elmi idarəedici böyük şəxsiyyət kimi daxil olub. Onun quruculuğu təkcə maddi quruculuq deyil, eyni zamanda mənəvi quruculuqla məşğul olub. Bunu SəsTV-yə ekskluziv açıqlamasında Yeni Azərbaycan Partiyası (YAP) Səbail rayon təşkilatının sədri, YAP İdarə Heyətinin üzvü Zahid Qaralov bildirib.

Rayon təşkilatının sədri Heydər Əliyevin öz həyat və fəaliyyəti dövründə idarəetmə nəzəriyyəsinə böyük töhfələr verdiyini qeyd edib: "Başqa siyasi xadimlərdən fərqli olaraq bütün həyata keçirəcəyi tədbirləri əvvəlcədən planlaşdırar və başqalarının görə bilmədiyi, ağlına gəlmədiyi metodlarla, prinsiplərlə həyata keçirərdi. Heydər Əliyev yeganə şəxsdir ki, ilk dəfə təhlükəsizlik orqanlarında general rütbəsinə qədər yüksəlib və həmin orqanın rəhbəri vəzifəsindən birbaşa siyasi arenaya keçdi, yəni Azərbaycanda Mərkəzi Komitənin 1-ci katibi seçildi. 15 respublika içərisində ən son yerlərdən birini tutan Azərbaycan qıza bir zaman kəsiyində böyük uğurlara imza atdı və ilk yerlərdən birinə yüksəldi. Daha sonra Heydər Əliyevin Moskvada SSRİ Nazirlər Sovetinin sədrinin 1-ci müavini vəzifəsində olarkən onun tabeliyində olan bütün nazirliklər, onların təmsil olunduğu bütün sahələrdə sürətli inkişaf baş verdi".

Z.Qaralov Heydər Əliyevin uğurlu fəaliyyətinin çoxlarını narahat etdiyini bildirdi: "Qorbaçov və onun kimilər kölgədə qalmışdılar. 1987-ci ildə Heydər Əliyevi vəzifədən və siyasi bürodan uzaqlaşdırdılar. Bu nəinki bir insana, ümumiyyətlə bütün Azərbaycana ağır bir zərbə idi. Moskvadan Bakıya qayıdan ulu öndər burada da təzyiqlərlə üzləşdi, daha sonra isə Naxçıvana getdi. Orada insanlar onu böyük sevinclə, təntənə ilə qarşıladı. Sonrakı mərhələlərdə, yəni Naxçıvan MR Ali Məclisinin sədri işlədiyi dövrlərdə özünün "partiyamızın qızıl fondu" adlandırdığı 91-lərin məktubu sanki günəşli bir gündə göydə şimşək çaxdı. Ulu öndərə ünvanlanan məktubda açıq-aşkar qeyd olunurdu ki, ölkə dağılır, vətəndaş müharibəsi başlayır, Azərbaycan parçalanır, Heydər Əliyev gəlməlidir və o bu vəziyyəti Bakıda sahmana salmalıdır. Bu açıq məktub "Səs"də dərc olundu. Bu bir növ qəzetlərimizin də ruhunu qaldırdı, onu tarixiləşdirdi".

Zahid Qaralov sonradan əhalinin də bu çağırışlara qoşularaq Heydər Əliyevin Azərbaycana gəlişindən danışdı: "O, artıq Sovet Azərbaycanına deyil, müstəqil, suverən Azərbaycan respublikasına rəhbərlik etməyə gəldi. Azərbaycan öz müstəqilliyini qazanandan sonra mərhum öndərimiz elan etdi ki, biz bazar iqtisadiyyatı yolu ilə gedəcəyik. Biz kommunizm yolundan qurtarmışıq".

Heydər Əliyev Konstitusiyanın qəbulundan, qanunlardan qərarlardan, özünün həyat və dünyanın yeni təcrübəsindən başlayaraq Azərbaycanı böyük inkişaf müstəvisinə çıxardı. "Ulu öndər Azərbaycanı çox bəlalardan qurtardı. Bu dörd istiqamətdə qazandığı təcrübə bu gün də bizim Azərbaycanda hakim partiyanın əsas siyasətini, məğzini, mahiyyətini təşkil edir. Heydər Əliyev Yeni Azərbaycan Partiyasını (YAP) yaratmaqla siyasi təfəkkürü dəyişdi və partiyaya siyasi mədəniyyət gətirdi", - deyə YAP Səbail rayon təşkilatının sədri Zahid Qaralov sözlərinə əlavə edib.